20 معلومة لأي مصري بيفكر يزور تونس !
تونس بعيون مصرية ... 20 معلومة لأى مصري بيفكر يزور تونس !
1- التوانسة يعرفوا عادل إمام وسعيد صالح ومسرحياتهم أكتر منك كمصري ... عادى جدا تلاقى واحد صاحبك أو سواق تاكسى حافظ مسرحية مدرسة المشاغبين أو العيال كبرت أو الزعيم عن ظهر قلب وبيسمع لك كل الأيفيهات.
2- لو انت كمصري راكب ميكروباص "لواج" أو الترام وجالك تليفون يفضل انك متردش عليه، لإنك لو رديت بلهجتك المصرية هتلاقى كل الناس سابت اللى بتعمله وهتتفرج عليك ولو فيهم بنات هيبدأوا يضحكوا عليك .. لما تسألهم بتضحكوا ليه .. الرد بيكون: أصلك بتتكلم زى التلفيزيون
3- لو قررت تشترى ساندوتش من أى مطعم وانت مبتحبش الأكل الحار "سبايسى فود" ... مش كفاية انك تقول للى بيعمل السندوتشات مش عايزه حار ... أو مش عايز هريسة "شطة" ... أنت لازم تبوس فوق راسه 10 مرات وتتوسل له علشان يقتنع بطلبك وإلا هتقضى باقى عمرك تعالج فى القولون..
4- لو شاب تونسي عرف إنك مصرى وسألك "إنت أهلاوى ولا زملكاوي ؟" وإنت أهلاوي .. أوعى تتسرع وتقع فى الفخ وتجاوب على سؤاله .. الإجابة المثالية هى "أنا ماليش فى الكورة وبشجع منتخب مصر للباليه المائي وهوكي الجليد
" .. لإنك لو قلتله انك أهلاوي فهو أكيد بيشجع "الترجي أو الأفريقى أو النجم الساحلى أو الصفاقسى" وده هيأثر على صداقتكم.
5- ممكن عادي جدا تكون بتكلم أستاذ فى الجامعة أو أم واحد صاحبك أو بنت زميلتك فى غاية الأدب والخجل وتلاقى حد منهم بيقولك بكل هدوء "ما تتمنيكش عليا" ... أه زى ما سمعتوا كدة ... الناس دى محترمة وزي الفل وبيبقى قصدهم "ما تتريقش عليا" مش أكتر.
6- الحصول على أى من المنتجات التالية على أرض تونس شبه مستحيل: الجبنة الرومي والبسطرمة والجبنة الفيتا واللب السوبر والخيار .. لو تعرف حد مسئول وليك واسطة كبيرة فى البلد ممكن تعرف تلاقى معلبات فول مدمس.
7- لو قعدت مع شباب توانسة ليهم فى السياسة ... هتلاقيهم حافظين قصائد أحمد فؤاد نجم وأغاني الشيخ أمام أكتر من أى حد قابلته فى مصر.
8- نص الأكل التونسي عبارة عن تونة "تن" و بيض نصف مسلوق "عضم" و شطة "هريسة" ... تقدر تحط عليهم أى حاجة تانية وتطلق عليه أسم أكلة.
9- البنات هنا فى تونس حقيقى شيك وستايلش ... أحلى حاجة لما تقول لواحدة تعرفها انتى شيك أنهاردة فترد عليك وتقولك " يعيشك وإنت زادا" يعنى شكرا و انت كمان :$
10- فى المعاملات الرسمية فيما يتعلق بالشغل فى ناس بتستعمل كلمة "سى" للأحترام زى ما بنستخدم كلمة أستاذ فى مصر ... يعنى يجيلى تليفون ساعات من واحدة تقول لى "سى محمد إسماعيل؟" ... لا إراديا بتخيل نفسى سى السيد وبحس إن أمينة بتكلمني وبلاقى نفسى حاطط رجل على رجل وانا برد عليها
11- لو حد تونسي مشفش مصريين قبل كدة وشافك للمرة الأولى ... فأنت كمصرى عليك واجب وطنى وإلتزام أخلاقى انك تضحكه ... مصرى يعنى بيهزر وبيضحك ... لدرجة إنك ممكن تكون بتتكلم عادى جدا وهو فاكرك بتهزر ويقعد يضحك
.. كمل عادى زى ما انت.
12- تلاقى كتير فى الشارع محلات مكتوب عليها "فواكه جافة" ... دى محلات بيتباع فيها كل حاجة إلا "الفواكه الجافة" ... هى أكشاك أو محلات بقالة بس مش عارف سبب التسمية.
13- العربية "السيارة" هنا فى تونس إسمها "كرهبة" وجمعها "كراهب" .. ومتفكرش تعمل فيلسوف وتسأل حد تونسي وتقوله إيه علاقة كلمة كرهبة بالسيارة ... لإنه رده هيكون جاهز وهيقولك "وأيه علاقة كلمة عربية بالسيارة" وهيبقى شكلك وحش.
14- لو عطشت وفكرت تشرب حاجة ساقعة وروحت كشك وقلت له عايز "كولا" ... هتلاقيه جايبلك صباع لزق "صمغ" ... لغاية ما توضحله أكتر انك عايز "كوكاكولا" .. أو تبقى تقول "كوكا" من الأول وتشترى دماغك
15- لو مسافر من تونس لبلد تانية على الخطوط التونسية وطيارتك الساعة 10 مثلا ... ممكن تروح المطار الساعة 11 وتلاقى الطيارة لسة مطلعتش عادى جدا
16- لو واحد تونسى خبط فى كتفك بيقولك "سامحنى" أو "يا ستار" ... ولو قلت له انك تعبان أو سمع خبر وحش يقولك "اللطف عليك".
17- عادي جدا ان تونسى يسألك: هو عدد السكان فى مصر بقى كام دلوقتى ؟ أو عدد سكان القاهرة ؟ .. غالبا هو بيكون عارف الإجابة بس منتظر ردك علشان يخبط كف على كف ويضحك ويقولك: أنتو عارفين تعيشوا مع بعض إزاى ؟
18- زوز "يعنى إتنين" ، هاكا "يعنى كدة" ، بنين "يعني حلو" ، دابوزة ماء "يعنى إزازة ميه" ، جازوز "يعنى حاجة ساقعة"، مونجيلة "يعنى ساعة" ، نهج "يعنى شارع"، سافا "كويس "، بابيه "مناديل"، توة "يعنى دلوقتى" وحاجات تانية كتير.
19- عادى جدا أن صاحب محل او سواق تاكسى أو اى حد تقابله بالصدفة يطلب رقمك ويقرر يعزمك عنده فى البيت على أكل تونسي و "يفرح بيك" زى ما التوانسة بيقولوا لمجرد انك مصري.
20- التوانسة شعب جميل ... بيحبوا الحياة ومتحضرين وتقدر تلمس ده فى أغلب تعاملاتهم معاك وخاصة مع المصريين ... اللى بيخطط لأجازة وبيفكر يزور تركيا أو أوروبا ييجي يزور تونس هيصرف فلوس أقل وهيتبسط حقيقي لو مهتم إنه يعرف ثقافة تانية ويزور بلد جميلة ميحسش فيها انه غريب.
ده ملخص 5 زيارات لتونس فى سنة ونص .. وإقامة ل 14 أسبوع ! بقلم المصري محمد إسماعيل
2:11:00 ص
