الشرطة تعتدي على طالبة رفقة والدها وتحيلهم على المحكمة
غريب ما يحدث في بلد القانون و المؤسسات و الامن الجمهوري الذي ما فتئ يتحدث في الحورات التلفزية عن تجديد علاقة الامن بالمواطن و تمتينها حيث وقع الاعتداء على الطالبة مريم رفقة والداها المبتورة ساقوه من طرف الشرطة و هذه القصة ننقلها كما هي : ما حدث معي أنا والدي اليوم هو كالآتي : وقفونا في بوابة حي الحبيب وقامو بتحرير محضر في معلوم الجولان بالرغم من إنه مصرح بالجولان إلى حدود 2 مارس لأن السيارة جديدة .. ومع ذلك قاموا بالإجراء .. كان والدي على أعصابو ومرهق ويحكي وحدو أصلا ولحد الآن أنا ما أدخلتش وما تكلمتش .. إلى إن قال البوليس " برا ملا معاق .. الضرب لكل معاق وعامل هكا .. والمعاقين إلي كيفك منين ليهم باش يعملو كراهب .. وهنا أنا هبطت من السيارة ومشيتلو وفي الأثناء كيف بابا تغشش وثار على نعتو بالمعاق دزوه في الأرض وكركروه لغرفة متاع البوابة ولطخوه على باب حديد وكتفو متضرر .. ووقت أنا مشيت للعون و قتلو " علاش تنعت فيه هكا . هاذي خدمتك ؟؟ " قالي سكر فمك يا عاهرة ( طبعا الكلمة باللهجة التونسية لكن نحشم باش نقولها ولا نعاودها ) وماكش متربية..وقالي يا خامجة وسمعني برشا ألفاظ سوقية .. قتلو " أنت ماكش متربي موش أنا ولعنة الله عليك .. وهنا كركرني للغرفة ولوالي يديا وحطلي المينوت وبعد نحاه .. وبابا ملتوخ في القاعة ومنهار كليا وأنا نصيح على خاطر بابا وهو يقلي يزي من الأفلام .. نبكي ونقرق بيهم باش يعطوني الماء من السيارة وتلفوني باش نكلم حد من العايلة يجيبلي دواء لبابا رفضو وماحبوش وقالولي تعمل في أفلام .. حتى لين جات سيارة الشرطة باش تهزنا .. أحد الأعوان وافق إنو بابا يخرج بسيارتو ويكون معانا عون في السيارة .. لكن العون إلي سبنا قال " هي بالذات نحبها تمشي كان في سيارة الشرطة .. وفي المركز سمعونا ما نكرهو .. وكذبونا وفي المحضر قالو إلي احنا ضربناهم وسبيناهم . على أساس هوما يخدمو في إجراء عادي .. وقال " أنا حاجتي بيها هي بالذات نتبعها " .. وقال ما نعتوش بالمعاق يكذبو .. قتلو أنا موش صحيح خلوني نرجع عليه ( يعني نجاوبو ) قام رئيس المركز قالي سكر فمك تو نهزك للافابو ترجع على قاعدة وتدخل عون آخر قالي " سكر فمك أنت صوتك عورة .. وفي كتابة المحضر .. ما كتبوش اقوالي كاملة وهي أنهم رفضو تمكيني من الهاتف للإتصال بالعائلة لجلب الدواء .. وحتى رئيس المركز بابا قلو يرحم بوك اعطيني حتى طابع سكر .. معطاهش وماجوبوش .. وبالرغم من هذا لكل بابا إعتذر من العون الشاكي لكن قالو أنت تهدد فينا .. رئيس المركز قاللنا الزملاء أمس ميتين بالكرتوش وأنتم اليوم عاملين هكا ؟؟ قتلو شمدخل امس فلي صار اليوم " قلي كلو تابع بعضو .. وأنتم محبيتوش حتى تصالحو .. وفي الأخير قالي تو تشوف البطاقة عد 3 كيفاش ماش تتحمم السم إلي شفتو فيهم ماراتوش عيني .. البوليسية ساندو بعضهم ضدي أنا وأصلا البوليس الشاهد لم يتم سؤاله فقط أمضى على المحضر ..وكان يغزرلي ويضحك ويقلي " إيه هو ماقاللكم شيء وأنت إلي سبيتو " و كان يستفز في والدي بالضحك غدوا نرجع للمركز أنا وبابا كل واحد فينا عندو قضية .. يمكن نتعدى للمحكمة ويمكن نروح .. يمكن نتحبس ويمكن تتعدى لاباس .. بابا مطيش في الدار وتاعب .. الله أعلم آش يصير .. وقد وقع احالة مريم و أبوها على المحكمة اليوم 18 فيفري لعرض المحضر لدى النيابة وهذا ما كتبته مريم على صفحتها في الفايسبوك: تمت احالتنا إلى المحكمة وهناك تم عرض المحضر لدى النيابة .. حيث اعادة سماعنا أنا والدي .. مبدئيا تمت الإحالة إلى الإقليم لأجل سماع الشاكيين أي أعوان البوليس ثم .. بعد ذلك القيام بالمكافحة .. كما قمت برفع دعوى فيما حصل لي ولوالدي .. و في الأثناء عند دخولي للمحكمة اتصلت بي ووالدتي وأعلمتني إنه قوات الحرس متواجدين في المنزل لإعلامنا بدعوى قضائية أخرى .. دعوى في بناء فوضوي منذ 2011 اثارها وكيل الجمهورية اليوم فقط .. .. وأنه سيتم الإلتجاء إلى إصدار أمر بالهدم في المنزل ... مع العلم أني امتلك رخصة بناء .. ومازلت أجهل سبب الدعوى .. سأعود إلى مركز الحرس الآن للتثبت .. شكرا لجيمع الأصدقاء شكرا لكل من إتصل بي ولكل من ساندني .. شكرا للمحامين الذين حضروا والذين تعذر عليهم الحضور .. شكرا لزملائي الطلبة
2:50:00 م
